उपत्यकामा संक्रमणदर नियन्त्रण गर्न नयाँ प्रावधान : आजबाट के गर्न पाइन्छ, के गर्न पाइँदैन ?

काठमाडौं : कोरोना स्रंक्रमणदर न्यूनिकरणका लागि काठमाडौं उपत्यकामा नयाँ प्रावधान ल्याइएको छ । काठमाडौं, भक्तपुर र ललितपुरका प्रमुख जिल्ला अधिकारीको बैठकले नयाँ प्रावधान ल्याएको हो ।

संयुक्त बैठकले  माघ मसान्तसम्म आमसभा, भेला, जुलुस गर्न नपाइने भएको छ । गोष्ठी, सेमिनार, समीक्षा बैठकजस्ता क्रियाकलापहरू सञ्चालन गर्दा भर्चुअल माध्यमबाट गर्न तथा गराउन पाइने निर्णय गरेको छ । बैठकको निर्णय अनुसार  भौतिक रूपमा उपस्थित गराउनु परेमा जनस्वास्थ्यका मापदण्ड पालना गरी २५ जना हुने गरी माघ ७ गतेपछि खोपको पूरा मात्रा लगाएका व्यक्तिहरूलाई मात्रै उपस्थित हुने गरी गराउन पाइनेछ ।

सिनेमा हल, डान्सबार, जिमखाना, दोहोरी, नाचघर, क्लब, हेल्थ क्लब स्वीमिङ पुल, फुटसल, पटके हाटबजार यही माघ १५ गतेसम्म सञ्चालन गर्न नपाइने बैठकले निर्णय गरेको छ । सार्वजनिक सवारीसाधनमा स्वास्थ्य प्रोटोकलमा कडाइ गरिएको छ । मास्क नलगाउने यात्रुलाई सहचालकले कम्तीमा पाँच रुपैयाँ लिएर मास्क उपलब्ध गराउनुपर्नेछ ।