पाँचखालमा काठमाडौं विश्वविद्यालयको कृषि विषयको पठनपाठन हुने

काभ्रे : जिल्लाको पाँचखाल नगरपालिकामा काठमाडौं विश्वविद्यालयको कृषि विषयको पठनपाठन हुने भएको छ । पाँचखाल नगरपालिकाको सहयोग र समन्वयमा काठमाडौं विश्वविद्यालयले नेपालमै पहिलोपटक यी विषयमा पठनपाठन सुरु गर्न लागेको पाँचखाल नगरपालिकाका प्रमुख महेश खरेलले जानकारी दिए ।

उनका अनुसार संरचना पूर्ण रूपमा तयारी भने हुन बाँकी रहेको छ । अबको केहि दिनमानै संरचनाले पूर्णता पाउने र औपचारिक रुपमा कक्षा सञ्चालन गर्ने गरी तयारी केयुले गरेको छ ।

हालसम्म अध्ययनका लागि ६५ जना भन्दा बढी विद्यार्थी भर्ना भइसकेका छन् । केयूले प्रविधि मैत्री कृषि संकाय स्नातक, स्नातकोत्तर र आर्टिफिसियल ईन्टेलिजेन्स स्नातक र स्नातकोत्तर तहसम्मको अध्ययन अध्यापन अनौपचारिक रुपमा सुरू गरेको नगरप्रमुख महेश खरेलले बताएका छन । काठमाण्डौ विश्वविद्यालयका स्कुल अफ साईन्सका डिन डाक्टर मनिष पोखरेलको टोलीले नगरपालिकामा बनिरहेको भौतिक संरचनाको अनुगमन तथा निरीक्षण समेत गरेको छ ।

विश्वविद्यालय स्तरको कृषि पढाई हुने भएपछि पाँचखालको कृषि प्रणालीमै नयाँपन आउने अपेक्षा गरिएको छ । बढ्दो रसायनिक मल तथा विषादीको प्रयोगले माटो बिग्रिरहेको तथ्यका माझ विश्वविद्यालयमा हुने नयाँ–नयाँ खोज र अनुसन्धानले पाँचखालको कृषिलाई जीवनदान दिन सक्ने  विश्वास गरिएको छ ।