महाभारतका ५३ घरधुरीमा खानेपानी वितरण

काभ्रे : जिल्लाको विकट मानिने महाभारत गाउँपालिकामा खानेपानी वितरण गरिएको छ ।

गाउँपालिकाको वडा नं ६ स्थित घ्याब्रिङ र बालखोपका ५३ घरधुरीमा खानेपानी वितरण गरिएको हो । बागमती प्रदेश सरकारको आर्थिक वर्ष २०७७/०७८ को प्रदेश विशेष अनुदान र गाउँपालिकाको साझेदारी बजेटबाट त्यहाँका ५३ घर परिवार र एक विद्यालयलाई ‘एक घर, एक धारा’ खानेपानी वितरण गरिएको गाउँपालिकाका अध्यक्ष कान्छालाल जिम्बाले जानकारी दिए । उनका अनुसार ‘एक घर र धारा’ कार्यक्रमबाट सो ठाउका  ३८० बासिन्दा लाभान्वित भएका छन् ।

मानिसको जीविका चलाउने पहिलो आधार खानेपानीको व्यवस्थापन गर्न सफल भएकोमा गाउँपालिका अध्यक्ष कान्छालाल जिम्बाले खुशी व्यक्त गरे । बागमती प्रदेश आर्थिक मामिला तथा योजना मन्त्रालयका सचिव धनिराम शर्माले दुर्गम गाउँपालिकाको विकट गाउँका बासिन्दालाई प्रदेश सरकारको साझेदारीमा खानेपानी उपलब्ध गराउन सफल भएको उनले बताए ।

लामो समयदेखि खानेपानीको समस्या झेल्दै आएका स्थानीबासी गाउँमा खानेपानी पुगेपछि खुशी भएका छन् । प्रदेश सरकार र गाउँपालिकाको सहयोगमा खानेपानीको व्यवस्था गरिदिएपछि स्थानीयबासी हर्षित भएको गाउँपालिकाको वडा नं ६ का वडाध्यक्ष रमेश लुङ्गेलीले बताए । उनका अनुसार पानीकै लागि यहाँका स्थानीयले धेरै संघर्ष गर्नु परेको थियो । अब त्यसको अन्त्य भएको उनी बताउँछन् ।

करिब साढे तीन किलोमिटर टाढाको बालखोप मुहानबाट मूल पाइप बिछ्याएर तीन ठाउँमा पानी ट्याङ्की निर्माण गरी घर–घरमा खानेपानी पु¥याइएको गाउँपालिकाका सव–इन्जिनियर प्रकाश खड्काले बताए। उनका अनुसार उक्त आयोजना सम्पन्न गर्नका लागि रु ४६ लाख ५० हजार ५०० को लागतमा मुख्य पाइपलाइन र वितरण पाइप लाइन गरी करिब ११ किलोमिटर पाइपलाइन बिछ्याएर खानेपानी धारा वितरण गरिएको हो ।