धुलिखलमा काभ्रे प्रहरीको नागरिक सुनुवाई तथा अन्तरक्रिया कार्यक्रम
काभ्रे : जिल्ला स्थित धुलिखेलमा जिल्ला प्रहरी कार्यालय काभ्रेद्वारा सञ्चालन गरिएको नागरिक सुनुवाई तथा अन्तरक्रिया कार्यक्रम सम्पन्न भएको छ ।
समुदाय–प्रहरी–साझेदारी कार्यक्रम अन्तर्गत आज श्रावण २ गते जिल्ला प्रहरी कार्यालय काभ्रेपलाञ्चोकको समंन्वयमा धुलिखेल नगरपालिकाको सभाहलमा कार्यक्रम सम्पन्न भएको कार्यालयले जनाएको छ ।
नगरपालिकाका प्रमुख अशोक कुमार व्याञ्जु श्रेष्ठको प्रमुख आतिथ्यतामा र जिल्ला प्रहरी कार्यालयका प्रमुख प्रहरी उपरीक्षक चक्रराज जोशीको अध्यक्षतामा नागरिक सुनुवाई तथा अन्तरक्रिया कार्यक्रम सम्पन्न भएको हो ।
जिल्ला प्रहरी कार्यालय काभ्रेपलाञ्चोकका सूचना अधिकारी प्रहरी नायव उपरीक्षक हरि खतिवडाले उक्त कार्यक्रमको सहजीकरण गर्नुको साथै समुदाय प्रहरी साझेदारी र नागरीक सुनुवाई कार्यक्रमको औचित्य बारे प्रस्तुत गरेका थिए।
उक्त कार्यक्रममा अपराधजन्य क्रियाकलाप नियन्त्रण, घरेलु मदिराजन्य पदार्थबाट श्रिजित दुर्घटना एवं सामाजिक बिकृति, समुदाय प्रहरी साझेदारी कार्यक्रमको पहुँच टोल स्तरसम्म विस्तार गर्नुपर्ने, बालबालिका एवं विद्यालय केन्द्रित कार्यक्रमहरुको विस्तार, सडक सुरक्षा केन्द्रित ट्राफिक गतिविधिमा वृद्धि गरिनुपर्ने विषयहरुमा आधारित उठेका प्रश्न तथा जिज्ञासाहरुलाई प्रहरी उपरीक्षक चक्रराज जोशीले सम्बोधन गरेका थिए ।
जिल्ला प्रहरी कार्यालय काभ्रे सदैव नागरीक सुरक्षाको सवालमा हरेक आयामबाट दत्त चित्त भई कर्तव्यरत रहेको प्रहरी उपरीक्षक जोशीको भनाई थियो । उक्त नागरीक सुनुवाई कार्यक्रम आयोजना गरेकोमा जिल्ला प्रहरी कार्यालय परिवारलाई आभार व्यक्त गर्दै धुलिखेल नगरपालिका नगरवासिको सुरक्षासँग कदापि सम्झौता नगर्ने र स्थानिय तहबाट समुदाय प्रहरी साझेदारी कार्यक्रम जनस्तरसम्म विस्तार गर्न धुलिखेल नगरपालिका कार्यालय प्रतिवद्ध रहेको नगर प्रमुख अशोक कुमार व्यञ्जु श्रेष्ठले बताए ।
कार्यक्रममा धुलिखेल नगरपालिकाका प्रमुख अशोक कुमार व्याञ्जु श्रेष्ठ, धुलिखेल नगरपालिकाका निर्वाचित जनप्रतिनिधिहरु, सामुदायिक विद्यालयका प्रधानध्यापक तथा शिक्षक, नागरिक समाज, स्थानीय जनसमुदाय लगायत प्रहरी कर्मचारीहरु उपस्थिती रहेको थियो ।