नेपालमा ओमिक्रोन : २४ जनामा संक्रमण पुष्टि

काठमाडौँ – नेपालमा थप २४ जनामा कोरोनाको ओमिक्रोन भेरिएन्ट पुष्टि भएको स्वास्थ्य तथा जनसंख्या मन्त्रालयले जनाएको छ । मन्त्रलालयले आज प्रेस विज्ञप्ती जारी गर्दै २४ जनामा संक्रमण पुष्टि भएको बारे जानकारी गराएको हो ।

पुस महिनाभर संकलित जम्मा ११४६ पोजिटिभ नमुनाहरुको एस–जिन स्क्रिनिङ गर्दा २५० वटा नमुनाहरु २२ प्रतिशत एस–जिन नेगेटिभ पत्ता लागेको स्वास्थ्य तथा जनसंख्या मन्त्रालयकी प्रवक्ता डा. संगीता कौशल मिश्राले बताइन् ।

उनका अनुुुसार एस–जिन नेगेटिभ पत्ता लागेका २४ नमुनाहरुको जिन सिक्वेन्सिङ गर्दा सबै नमुनाहरुमा भेरिएन्ट पुष्टि भएको हो । मन्त्रालयले पुष ७ गते नेपालमा पहिलोपटक ओमिक्रोन पुष्टि भएको जनाएको थियो । यसअघि ३ जनामा ओमिक्रोन पुष्टि भइसकेको छ । यो सँगै नेपालमा २७ जनामा ओमिक्रोन भेरिएन्ट पुष्टि भएको छ ।

ओमिक्रोन भेरिएन्टले गर्दा हुन सक्ने अत्यधिक बिरामीहरूको चापलाई मध्यनजर गर्दै सबै अस्पतालहरुलाई तयारी अवस्थामा रहन र उपचारका लागि आवश्यक पर्ने अक्सिजन लगायत अन्य सामाग्रीहरुको पर्याप्त जोहो गर्न र स्वास्थ्यकर्मीहरुलाई तयारी अवस्थामा रहन मन्त्रलालयले निर्देशन दिएको छ ।