नक्कली पीसीआर रिपोर्टको धन्दा गर्ने काभ्रेका माधव सहित ४ जना पक्राउ
काभ्रे : नक्कली पीसीआर रिपोर्टको धन्दा गर्ने काभ्रेको तेमाल गाउँपालिका वडा नं ५ का माधव मैनाली सहित ४ जनालाई प्रहरीले पक्राउ गरेको छ । काठमाडौं र भक्तपूरको अस्पताल र र प्रयोगशालामा नक्कली पीसीआर रिपोर्टको धन्दा गरेको अभियोगमा ४ जनालाई प्रहरी पक्राउ गरेको हो ।
पक्राउ पर्नेमा विदेह नगरपालिका -४ धनुषाका रोशनकुमार छिट्टान, छिरेश्वर नगरपालिका-१ धनुषाका नागेन्द्र यादव, तेमाल गाउँपालिका-५ काभ्रेका माधव मैनाली र बलरा नगरपालिका-७ सर्लाहीका प्रसन्न कुमार झा छन् ।
अपराध अनुसन्धान महाशाखाका सूचना अधिकृत प्रहरी उपरिक्षक कृष्णप्रसाद कोइरालाका अनुसार भक्तपुरको मध्युपर थिमीस्थित नागरिक कम्युनिटी टिचिङ अस्पताल र काठमाडौंको तीनकुनेस्थित कान्तिपुर अस्पतालबाट नक्कली पीसीआर रिपोर्ट बनाएको अभियोगमा त्यहाँका कर्मचारी र केही विचौलिया पक्राउ परेका हुन् ।
त्यस्तै, राजदेवी नगरपालिका ४ रौतहटका भावेश मित्र र काठमाडौं महानगरपालिका ३२ का निर्मल गिरी भने फरार छन् । केहि अस्पताल र प्रयोगशालाहरुले विचौलियासँग मिलेर नक्कली पीसीआर रिपोर्ट बनाइदिने र त्यसबापत चर्को शुल्क असुल्ने गरेको पाइएको नेपाल प्रहरीको अपराध अनुसन्धान महाशाखाले जनाएको छ ।
ट्रेन्डिङ
सम्बन्धित खबर
