१२६ किलो गाँजासहित दुई पुरुष पक्राउ

सर्लाही : १२६ किलो गाँजासहित दुई जना पुरुषलाई प्रहरीले पक्राउ गरेको छ । पक्राउ पर्नेमा गाडी चालक धादिङको सिदुलेख गाउँपालिका–६ का २२ वर्षीय सुरेन्द्र विक र गाडीमा सवार मकवानपुरको कैलाश गाउँपालिका–२ का ४८ वर्षीय भीमलाल मोक्तान रहेको जिल्ला प्रहरी कार्यालय सर्लाहीका सूचना अधिकृत प्रहरी निरीक्षक कृष्ण गिरीले जानकारी दिए ।

शनिबार बिहान लालबन्दी नगरपालिका–१ बावानि हेल्थ केयर अगाडि पूर्व पश्चिम राजमार्गमा पश्चिमबाट पूर्व तर्फ आउँदै गरेको प्र ३–०१–०२४ च ७५९१ नम्बरको माछा बोक्ने पिकअप गाडीबाट लागुऔषध गाँजा बरामद गरिएको हो ।

माछा राख्ने पहेलो ड्रम भित्रबाट १२६ केजी गाँजा बरामद गरिएको प्रहरी निरीक्षक गिरीले जानकारी दिए । ८५ हजार नगर समेत बरामद गरेको र थप अनुसन्धान थालेको जिल्ला प्रहरी कार्यालय सर्लाहीले जनाएको छ ।