काभ्रे नमोबुद्धकी एक महिला मृत अवस्थामा फेला

काभ्रे : जिल्लाको नमोबुद्ध नगरपालिकाकी एक महिला  मृत अवस्थामा फेला परेकी छिन् । भक्तपुर जिल्लाको चाँगुनारायण नगरपालिका वडा नम्बर ७ मा सोमबार साँझ एक महिलाको शव भेटिएको प्रहरीले जनाएको छ ।

काभ्रे जिल्लाको नमोबुद्ध नगरपालिका वडा नम्बर ९ स्थायी घर भएकी करिब २८ वर्षकी जेनिसा नगरकोटी मृत अवस्थामा फेला परेको महानगरीय प्रहरी परिसर भक्तपुरका सूचना अधिकारी डीएसपी राजु पाण्डेले बताए । उनका अनुसार मृतक महिला केही समयदेखि चाँगुनारायणमा बस्दै आएकी थिइन् ।

प्रहरीको प्रारम्भिक अनुसन्धानमा हत्या भएको देखिएको डीएसपी पाण्डेले बताए । मृतक नगरकोटीको घाँटीमा चोट देखिएको प्रहरीले जानकारी दिएको छ । मृतकको शव पोष्टमार्टमका लागि दुवाकोटस्थित काठमाडौं मेडिकल कलेजमा पठाइएको छ । यसबारेमा प्रहरीले थप अनुसन्धान गरिरहेको समेत डीएसपीले जानकारी दिएका छन् ।