संखुवासभामा बस दुर्घटना : १४ जनाको मृत्यु

संखुवासभा : संखुवासभामा आज बिहान यात्रुबहाक बस दुर्घटना भएको छ।

बस दुर्घटनामा परी १४ जनाको मृत्यु भएको प्रदेश–१ प्रहरी कार्यालय विराटनगरले जनाएको छ । अधिकांशको घटनास्थलमै मृत्यु भएको कार्यालयका प्रवक्ता प्रहरी उपरीक्षक नवीनराज राईंले जानकारी दिए ।

उनका अनुसार घटनामा परी पाँचजना घाइते भएका छन् । घाइतेलाई उपचारका लागि धरान पठाइएको छ । प्रवक्ता राईले भने, “घटनास्थलमा घाइतेहरूको उद्धारमा स्थानीय र नेपाल प्रहरीको टोली परिचालन भएको छ ।”

मादीबाट झापाको दमकतर्फ जाँदै गरेको बा४ख ७३५ नम्बरको बस साढे ५ बजेतिर मादी नगरपालिका–६ स्थित सातघुम्तीमा दुर्घटना परेको थियो । बस सडकबाट करिब तीन सय मिटर तल खसेको थियो ।

घटनाबारे थप अनुसन्धान तथा मृतक र घाइतेको सनाखत क्रम जारी रहेको प्रदेश प्रहरी कार्यालयले जनाएको छ ।