नमोबुद्ध नगरपालिकाले प्रत्येक कार्यपालिका बैठकको निर्णय वेबसाइटबाट सार्वजनिक गर्ने

काभ्रे : जिल्लाको नमोबुद्ध नगरपालिकाले प्रत्येक कार्यपालिका बैठकको निर्णय नगरपालिकाको वेबसाइटबाट सार्वजनिक गर्ने निर्णय गरेको छ । आज बसेको नगरपालिकाको कार्यपालिकाको बैठकले हरेक कार्यपालिका बैठकका निर्णयहरू नगरपालिकाको आधिकारिक वेबसाइटबाट सार्वजनिक गर्ने निर्णय गरेको हो ।

नगर प्रमुख कुनसाङ लामाको अध्यक्षतामा बसेको कार्यपालिकाको पहिलो बैठकले नमोबुद्ध नगरपालिकाको पहिलो कार्यपालिका बैठक प्रवक्ता चयन र न्यायिक समिति गठन गर्दै सम्पन्न भएको हो ।

नगरपालिकाको कार्यपालिकाको पहिलो बैठकले नगर कार्यपालिकाको निर्णय, बिज्ञप्ति, सार्वजनिक महत्वका सूचना लगायत सार्वजनिक गर्ने कार्यका लागि वडा नं ६ का वडा अध्यक्ष टिकाबहादुर केसीलाई प्रवक्ता तोक्ने निर्णय गरेको छ ।

प्रवक्ता टिकाबहादुर केसीका अनुसार आजको बैठकले नगर उपप्रमुखको संयोजकत्वमा रहने न्यायिक समितिलाई पुर्णता पनि दिएको छ । समिती संयोजक उपप्रमुख रत्नबहादुर लामा रहेका छन् भने समिति सदस्यमा वडा नं ४ का वडा अध्यक्ष अर्जुनबहादुर कार्की र वडा नं ७ का वडा अध्यक्ष धर्मसिं लामा रहेका छन् ।

बैठकले मेथिनकोट अस्पतालको व्यवस्थापन समितिमा नगरपालिकाबाट सदस्य रहने व्यवस्था अनुसार वडा नं ३ का वडा अध्यक्ष रमेश तिवारीलाई सदस्य तोक्ने निर्णय गरेको छ भने नगरपालिकामातहत रहेको एउटा एम्बुलेन्सलाई दाप्चा स्वास्थ्यचौकी मातहत राखेर सञ्चालन गर्ने निर्णय पनि गरेको छ ।

कार्यपालिकाको पहिलो बैठक अघि नगर प्रमुख कुनसाङ लामाले कार्यपालिका सदस्यमा निर्वाचित भएका आठ जना सदस्यलाई सपथ ग्रहण गराएका थिए ।