जुम्लामा चट्याङ लागेर एक जनाको मृत्यु

जुम्ला : जुम्लामा चट्याङ लागेर एक जनाको मृत्यु भएको छ । मृत्यु हुनेमा तिला गाउँपालिका ९ निवासी प्रेम बुढा रहेको प्रहरीले जनाएको छ । जिल्ला प्रहरी कार्यालय जुम्लाका अनुसार तिला गाउँपालिकाको रारालिहीबाट ४ घण्टा पैदल यात्रा गरेर पुगिने उक्त स्थानमा घटना भएको हो ।

मालापानी घरबाट टाढा दुई किमी सिमी गोड्न गएका १८ वर्षका बुढाको चट्याङ लागेर मृत्यु भएको जिल्ला प्रहरी कार्यालय जुम्लाका सूचना अधिकारी तथा प्रहरी निरीक्षक भुवन भट्टले जानकारी दिए ।

उनका अनुसार पानी परेपछि उनी रुखको मुनि ओत लाग्न बसेका थिए । सोही स्थानमा चट्याङ परेको थियो । उक्त घटनापछि मध्यरात नै प्रहरी घटनास्थलमा पुगेको थियो। स्थानीयका अनुसार बुढाले बोकेको मोबाइलमा समेत क्षति भएको छ ।