ललितपुरको पुल्चोकमा एक पुरूष मृत अवस्थामा भेटिए

ललितपुर : ललितपुरको पुल्चोकमा एक पुरूष मृत अवस्थामा भेटिएका छन् । बुधबार बिहान पुल्चोकस्थित एक घरमा डेरा गरी बसेका पुरूष मृत फेला परेको जिल्ला प्रहरी परिसर ललितपुरका प्रहरी नायब उपरीक्षक अंगुर जिसीले जानकारी दिए।

उनका अनुसार पुल्चोक क्षेत्रमा कुमार भनेर चिनिने उनी आफ्नै कोठामा झुन्डिएको अवस्थामा फेला परेका हुन्। पुल्चोकमा मःम पसल सञ्चालन गर्दै आएका उनी बिहान पसल खोल्न नआएपछि छिमेकीहरू उनलाई घरमा बोलाउन गएका थिए। तर उनले ढोका खोलेनन्।

ढोका नखोलेपछि स्थानीय आफैंले भर्‍याङ राखेर हेर्दा उनी झुन्डिएको अवस्थामा प्रहरीलाई खबर गरिएको थियो। अहिले प्रहरीको टोली घटनास्थलमा छ।  मुचुल्का उठाएर शवको पोष्टमर्टमको लागि पाटन अस्पताल लग्ने तयारी गरिएको प्रहरी नायब उपरीक्षक जिसीले बताए ।