विभिन्न मुद्दामा फरार रहेका काभ्रेका दुई प्रतिवादी पक्राउ

काभ्रे : विभिन्न मुद्दामा फरार रहेका काभ्रेका दुई प्रतिवादीलाई प्रहरीले पक्राउ गरेको छ । चोरी मुद्दामा फरार रहेका जिल्लाको तेमाल गाउँपालिका वडा नं २ का २७ वर्षीय संजिव तामाङलाई ६ वर्षपछि पक्राउ गरिएको जिल्ला प्रहरी कार्यालय काभ्रेले जनाएको छ ।

कार्यालयका अनुसार तामाङलाई चोरी मुद्दामा जिल्ला अदालत काभ्रेपलाञ्चोकले २०७३ साल पौष १८ गते १ महिना कैद र २१ हजार ९ सय २० रुपैँया जरिवानाको फैसला गरेको थियो । अदालतको फैसलापछि फरार रहेका तामाङलाई प्रहरीले श्रावण २० गते तेमाल गाउँपालिका वडा नं २ बाट पक्राउ गरिएको प्रहरीले जनाएको छ ।

त्यस्तै अंशबण्डा मुद्दा शिर्षकमा फरार रहेका जिल्लाको पनौती नगरपालिका वडा नं ४ का ५० वर्षीय सुवास केसीले प्रहरीले १० वर्षपछि पक्राउ गरेको छ । के.सीलाई अंशबण्डा मुद्दा शिर्षकमा जिल्ला अदालत काभ्रेपलाञ्चोकले २०६८ चैत्र १ गते ९ सय ६ रुपैँया जरिवानाको फैसला गरेको थियो । अदालतको फैसलापछि फरार रहेका के.सीलाई प्रहरीले श्रावण २० गते पनौती नगरपालिका वडा नं ४ बाट पक्राउ गरिएको प्रहरीले जनाएको छ ।

पक्राउ परेका दुई प्रतिवादीलाई फैसला कार्यन्वयनको लागि काभ्रेपलाञ्चोक जिल्ला अदालतमा पेश गरिएको जिल्ला प्रहरी कार्यालय काभ्रेले जानकारी दिएको छ ।