पूर्व अरनिको यातायात सेवा प्रालिको निर्वाचन आज
काभ्रे : पूर्व अरनिको यातायात सेवा प्रालिले आज (बुधबार) निर्वाचन गर्दैछ । नेपालका ठूला यातायात कम्पनीमध्येको एक सो कम्पनीको आज निर्वाचन हुँदैछ ।
राजधानी पूर्वका सातभन्दा बढी जिल्लामा लामो समयदेखि यातायात सञ्चालन गर्दै आएको अरनिको यातायात सेवा समितिको रूपान्तरित पूर्व अरनिको यातायात कम्पनी प्रालिको अध्यक्ष पदमा तीन जनाको उम्मेदवारी परेको छ ।
अध्यक्षका लागि अरनिको यातायातका पूर्व अध्यक्ष एवं बलेफी गाउँपालिकाका पूर्वअध्यक्ष केदार क्षत्री, समितिका वरिष्ठ उपाध्यक्ष नृपध्वज महत र व्यवसायी उद्धव गौतमले अध्यक्षमा उम्मेदवारी दर्ता गराएका छन् ।
तत्कालीन अरनिको यातायात सेवा समिति पूर्व अरनिको यातायात सेवा प्रालिका नाममा रूपान्तरण भएको थियो । कम्पनीमा रूपान्तरण गर्दा कम्पनी रजिस्ट्रारको कार्यालयमा सो कम्पनीका दुई सयवटा मात्रै बसको विवरण पेस गरेको थियो तर बुधबार हुने निर्वाचनमा कम्पनीका ५८३ जना सदस्यले मतदान गर्दैछन् ।