मोटरसाइकल एक आपसमा ठोक्किएर दुर्घटना हुदाँ बाबुछोराको मृत्यु

रुपन्देही : रुपन्देहीको बुटवलमा मोटरसाइकल एक आपसमा ठोक्किएर दुर्घटना हुदाँ बाबुछोराको मृत्यु भएको छ ।

पूर्वपश्चिम राजमार्ग अन्तर्गत बुटवल–१३, बेलवास चोकमा पूर्वबाट पश्चिमतर्फ आउँदै गरेको लु४१प ४१६८ नम्बरको मोटरसाइकल र विपरीत दिशाबाट आउँदै गरेको लु४८प ३२४६ नम्बरको मोटरसाइकल एक आपसमा ठोक्किँदा बुटवल–१३ बेलवास बस्ने ४० वर्षीय सोनु भट्टराई र उनका ५ वर्षीय छोरा निशान भट्टराईको मृत्यु भएको हो ।

सोही मोटरसाइकलमा पछाडि सवार १५ वर्षीय आयुष आचार्य भने घाइते भएका छन् । लु४८प ३२४६ नम्बरको मोटरसाइकलका चालक पाल्पा, रामपुर–२ बस्ने २३ वर्षीय अमृत सुनारी मगर पनि घाइते भएका छन् । घाइते दुवै जनाको लुम्बिनी प्रादेशिक अस्पताल बुटवलमा उपचार भइरहेको प्रहरीले जनाएको छ ।

प्रहरीका अनुसार दुई मोटरसाइकल ठोक्किएपछि पश्चिमबाट पूर्वतर्फ जाँदै गरेको लु१क ४४२४ नम्बरको ट्याङ्कर मुनि लु४१प ४१६८ नम्बरको मोटरसाइकल पर्न जाँदा मानवीय क्षति भएको हो । उक्त ट्याङ्करलाई पनि प्रहरीले नियन्त्रणमा लिएको छ ।