आत्महत्या न्यूनिकरण गर्न काठमाडौँ प्रहरीले ‘सम्पर्क व्यक्ति तोकेर’ अभियान सञ्चालन गर्दै

काठमाडौं : आत्महत्या न्यूनिकरणका लागि काठमाडौं प्रहरीले अभियान सञ्चालन गरेको छ । आत्महत्याका घटना न्यूनिकरण गर्नका लागि काठमाडौँ प्रहरीले सम्पर्क व्यक्ति तोकेर ‘न्युनिकरण अभियान’ सुरु गरेको हो ।

प्रहरी नायव उपरिक्षक (डीएसपी)लाई सम्पर्क व्यक्ति तोकेर तत्काल उद्दार र चिकित्सकको सहयोगमा परामर्श दिन थालिएको जिल्ला प्रहरी परिसर काठमाडौंका एसपी दिनेशराजले जानकारी दिए ।

उनका अनुसार उपत्यकामा आत्महत्याका घटना दैनिक बढेपछि न्यूनिकरण गर्न डीएसपी इन्चार्ज हुने प्रहरी वृत्तका इन्स्पेक्टरहरुलाई र प्रहरी प्रभागका इन्चार्जलाई पनि फोकल पर्सन तोकिएको छ । फोकल पर्सन मार्फत त्यस्ता घटनाको सुचना लिएर तत्काल उद्दारका लागि परिचालन गरिने एसपी मैनालीले बताए ।

आत्महत्या गर्न खोज्नेहरूलाई उद्धारपछि चिकित्सकको सहयोगमा प्रहरीले काउन्सिलिङ गर्ने भएको छ । सामुदायिक प्रहरी साझेदारी कार्यक्रम अन्तर्गत काउन्सिलिङको लागि नेपाल प्रहरी अस्पतालका चिकित्सक परिचालित हुनेछन् । फोकल पर्सनहरुलाई प्रहरी अस्पतालका विशेषज्ञ डाक्टरहरुले प्रशिक्षण प्रदान गर्ने उनले जानकारी दिए ।

आत्महत्याबाट प्रभावित क्षेत्रहरुमा सचेतनामूलक कार्यक्रम संचालन गर्ने काठमाडौं प्रहरीको योजना छ ।