बाँकेको कुसुमबाट हराएका दुई बालिका एक हप्तापछि पोखरामा भेटिए
नेपालगन्ज : बाँकेको कुसुमबाट हराएका दुई बालिका एक हप्तापछि एक हप्तापछि पोखरामा भेटिएका छन् । यही असोज ४ गतेदेखि बाँकेको राप्ती सोनारी गाउँपालिका वडा नम्बर १ कुसुम बैरिया निवासी ११ वर्षीया बन्दना बिक र निशा परियार हराएका थिए ।
एक हप्तादेखि हराएका दुवै बालिका पोखरामा सकुशल भेटिएको इलाका प्रहरी कार्यालय कोहलपुरका प्रमुख एवं प्रहरी नायव उपरीक्षक (डीएसपी) ऐनबहादुर मल्लले जानकारी दिए । उनका अनुसार बालिकाहरू पोखरामा फेला परेको परिवारले जानकारी गराएको छ । उनीहरू कसरी र कोसँग पोखरा पुगे भन्नेबारे थप अनुसन्धान उनले बताए ।
गत मंगलबार बेलुका करिब ८ बजेतिर घरमा खाना खाएर सुत्ने क्रममा उनीहरू एक्कासी हराएका थिए । बालिका हराएको दुई दिनपछि बिहीबार परिवारले इलाका प्रहरी कार्यालय कुसुममा निवेदन दर्ता गराएका थिए । इप्रका कुसुमले परिवारसँग बालिकाको फोटो मागेर हुलियासहितको विवरण इलाका प्रहरी कार्यालय कोहलपुरमा पठाएको थियो ।