बेथानचोक अध्यक्ष कप फूटबलको उपाधि भूमेमातालाई

काभ्रे । बेथानचोक गाउँपालिका र बेथानचोक खेलकुद विकास समितिद्वारा आयोजित चौथो बेथानचोक अध्यक्ष कप वडा स्तरीय फूटबल प्रतियोगिता २०७९ को उपाधि वडा नं ४ को भूमेमाता युवा क्लबले जितेको छ ।

प्रतियोगितामा वडा नं. ४ कै गणेशस्थान युवा क्लब दोश्रो भयो भने वडा नं. ६ को स्टार युवा क्लब तृतीय भयो । मंसिर २० देखि २५ गतेसम्म चलेको प्रतियोगिता आज शनिबार सम्पन्न भएको छ ।

आजको खेलमा निर्धारित समयसम्म दुवै तर्फ २÷२ गोलको बरावी भएर थपिएको समयमा पनि कुनै गोल हुन नसकेपछि प्रतियोगिता ट्राइब्रेकर तर्फ धकेलिएको थियो ।

प्रतियोगिताको समापन कार्यक्रमलाई सम्बोधन गर्दै बेथानचोक गाउँपालिका अध्यक्ष भगवान अधिकारीले बेथानचोक गाउँपालिकाले खेलकुदको विकासमा ध्यान दिएको बताउँदै समय समयमा यस्ता प्रतियोगिता गर्दै जाने बताए । खेलले शरीर र मन दुवै स्वस्थ रहने बताउँदै उनले खेलकुदले एकाग्रता, अनुशासन, आपसी सदभाव र भाइचारा वृद्धि हुने पनि बताए ।

वडा स्तरबाटै खेलकुद विकासका लागि र युवाहरुमा खेल भावना वृद्धि गर्न यस्ता प्रतियोगिता सहायक हुने उनका भनाई थियो । नयाँ प्रतिभा जन्मिने र क्रियाशीलहरुको शैली र शिल्पीमा निखारपन आउने हुँदा पनि खेलकुदको विकाससँगै यसका पूर्वाधार विकासका लागि पनि आफूहरु जिम्मेवार भएर लागि रहने बताए ।

खेलकुदका पूर्वाधार विकास गर्न सके कृषि र पर्यटनसँगै खेलकुदबाट पनि बेथानचोकले केही गर्नेमा आफू विश्वस्त रहेको उनको भनाई छ । खेलकुद मनोरञ्जनका लागि मात्र नभएर राष्ट्रको आधार पनि भएकोले खेलकुदलाई गाउँपालिकाले प्राथमिकतामा राखेको उहाँको भनाइ थियो ।

प्रतियोगितामा प्रथम हुने टिमले नगद रु ६० हजार प्रमाण पत्र र ट्रफी, दोश्रो हुने हुने टिमले नगद रु ३० हजार प्रमाण पत्र र ट्रफी र तेश्रो हुने टिमले हुने टिमले नगद रु १५ हजार प्रमाण पत्र र ट्रफी प्राप्त गरेका छन् । प्रतियोगितामा भूमेमाताका सुन्दर तामाङ उत्कृष्ट खेलाडी घोषित भए ।