
काभ्रे । जिल्लाको पनौती नगरपालिका पूर्णखोप सुनिश्चित पालिका घोषणा भएको छ । नगरप्रमुख रामशरण भण्डारीले पनौती नगरपालिकालाई पूर्णखोप सुनिश्चित पालिका घोषणा गरेका हुन् ।
राष्ट्रिय खोप निर्देशिकाअनुसार सम्पूर्ण प्रक्रिया पूरा गरी जन्मदेखि १५ महिना र १६ देखि ५९ महिनामुनीका सम्पूर्ण बालबालिकालाई सबै खोप लगाएकोले पनौती नगरपालिकालाई पूर्णखोप सुनिश्चितता घोषणा गरिएको नगरप्रमुख भण्डारीले जानकारी दिए ।
कार्यक्रममा नगरप्रमुख भण्डारीले शिक्षा, स्वास्थ्य, पूर्वाधार विकास र मानवीय विकासको क्षेत्रमा नगरपालिका एक कदम अगाडि रहेको बताए । उनका अनुसार, पालिकालाई पूर्णखोप सुनिश्चित बनाउन स्वास्थ्य क्षेत्रमा कार्यरत सबै स्वास्थ्यकर्मीको योगदान अतुलनीय रहेको छ ।
कार्यक्रममा जिल्ला खोप समन्वय समितिका संयोजक एवं समन्वय समिति प्रमुख दिपककुमार गौतमले नगर प्रमुख भण्डारीलाई पूर्ण खोप सुनिश्चितताको प्रमाणपत्र हस्तान्तरण गरेका हुन् । समन्वय प्रमुख गौतमले नगरपालिकाले हरेक क्षेत्र विकाससँगै स्वास्थ्य क्षेत्रलाई पनि प्राथमकितामा राखेर काम गरिरहेकोमा बधाई तथा शुभकामना व्यक्त गरे ।