काठमाडौँ । टिकटकले फिफासँग विश्वव्यापी साझेदारी गर्दै सन् २०२६ को फिफा विश्वकपको आधिकारिक डिजिटल कभरेज गर्ने भएको छ। यस साझेदारीमार्फत समर्थकहरूले बीहाइन्ड–द–सीन एक्सेस र इन्टरएक्टिभ फ्यान अनुभवहरूको पहुँच पाउनेछन्। सम्झौता सन् २०२६ को अन्त्यसम्म लागू हुनेछ र फुटबलको सबैभन्दा ठूलो प्रतियोगिता डिजिटल माध्यमबाट अनुभव गर्न सकिनेछ।
साझेदारी अन्तर्गत टिकटकले लाइभ खेल प्रसारणका साथै समर्थक र कन्टेन्ट क्रिएटरहरूलाई प्रतियोगितासँग जोड्ने मुख्य भूमिका निर्वाह गर्नेछ। यसले टिकटकलाई मौलिक सामग्री सिर्जना बढाउने अवसरका साथै विश्वकपको अझ व्यापक कभरेज प्रदान गर्ने क्षमता दिनेछ। प्रतियोगिताभर टिकटक समर्थक र क्रिएटरहरूका लागि मुख्य प्लेटफर्मको रूपमा इन्टरएक्टिभ र समुदायमा आधारित अनुभव प्रदान गर्नेछ।
यस साझेदारीले फिफा महिला विश्वकप २०२३ का क्रममा टिकटक र फिफाबीच भएको सफल सहकार्यको निरन्तरता पनि देखाउँछ। त्यो सहकार्यले विश्वभर दशौँ अर्ब भ्युज प्राप्त गर्दै डिजिटल प्लेटफर्महरू खेल सामग्री उपभोगमा कत्तिको प्रभावशाली हुन सक्ने देखाएको थियो।
साझेदारीको केन्द्रमा टिकटकको इमर्सिभ फिफा विश्वकप २०२६ हब रहनेछ। टिकटक गेम प्लानद्वारा सञ्चालित यस हबमार्फत समर्थकहरूले ४८ टोली सहभागी हुने प्रतियोगितामा सक्रिय रुपमा भाग लिन सक्नेछन्।
